राजेश कुमाल 

काठमाडौँ,  नेपाल सुनचाँदी व्यवसायी महासंघले देशका प्रमुख अस्पतालहरूसँग स्वास्थ्य सेवा शुल्कमा विशेष छुट सुविधा प्रदान गर्ने सम्झौता (MOU) गरेको छ। यसका माध्यमबाट महासंघ तथा जिल्ला/नगर/वस्त्रुत संघका सदस्य, कर्मचारी तथा परिवारका सदस्यहरूले उपचार, स्वास्थ्य परीक्षण र विभिन्न प्याकेजहरूमा छुट पाउने भएका छन्।

स्वास्थ्य उपचारको खर्च निरन्तर बढ्दै गएको अवस्थामा सदस्य व्यवसायीहरूको पहुँचलाई सहज बनाउने उद्देश्यसहित महासंघले पछिल्ला वर्षयता स्वास्थ्य तथा सामाजिक सुरक्षासम्बन्धी कार्यक्रमलाई प्रमुख प्राथमिकता दिएको छ। यसै क्रममा प्रमुख अस्पतालहरूसँग गरिएको यो MOU लाई महासंघले महत्वपूर्ण उपलब्धिका रूपमा लिएको छ।

 नर्भिक इन्टरनेशनल अस्पताल – थापाथली, काठमाडौं, ग्रान्ड इन्टरनेशनल अस्पताल – टोखा, काठमाडौं, मेडिसिटी अस्पताल – नक्खु, ललितपुर, ह्याम्स अस्पताल – चाबहिल, काठमाडौं, वयोथा अस्पताल – बलम्बु, काठमाडौं (सम्झौता प्रक्रियामा) रहेको महासंघले जारी गरेको सूचना अनुसार निम्न अस्पतालहरूसँग छुटसम्बन्धी सम्झौता भइसकेको जनाएको छ ।

यी अस्पतालहरूले  विभिन्न स्वास्थ्य सेवा, उपचार शुल्क, ल्याव परीक्षण, रेडियोलोजी, एम्बुलेन्स र बेड चार्ज,भर्ना शुल्क तथा स्वास्थ्य परीक्षण प्याकेजहरूमा छुट उपलब्ध गराउनेछन्। छुट पाउने प्रक्रियामा महासंघ वा सम्बन्धित संघले जारी गरेको परिचय पत्र र सिफारिस पत्र अनिवार्य रहनेछ।

महासंघका पदाधिकारीहरूका अनुसार निकट भविष्यमा अन्य प्रतिष्ठित अस्पताल तथा स्वास्थ्य सेवाप्रदायक संस्थासँग पनि सहकार्य विस्तार गर्ने तयारी भइरहेको छ। महासंघले सबै जिल्ला, नगर तथा वस्त्रुत संघहरूलाई छुट सुविधा प्रभावकारी रूपमा कार्यान्वयन गर्न आग्रह गरेको छ।

यसका लागि— सदस्य परिचय प्रमाणीकरण, सिफारिस पत्र जारी गर्ने प्रक्रिया, सूचना प्रवाह, अस्पतालहरूसँगको प्रत्यक्ष समन्वय जस्ता विषयमा विशेष ध्यान दिन महासंघले आग्रह गरेको छ।